Arktinen silkkitie—Köken Ergun ja Sasha Azanova projekti

Arktinen silkkitie—Köken Ergun ja Sasha Azanova projekti

Kin nykyaijantaitheen myseymmissä 4/10 2024 – 12/1 2025
Auasthaan tuorestaina 3 oktuuperia/lokakuuta 16:00-18.00
Paikka: Taitevärsta
Arktinen silkkitie selittää jään sulamisesta Arktisessa ja kuljetusreititten hausta Kiinasta Euruuphaan. Yks globalin lämpiämisen monesta seurauksista oon ette jääpeitto merelä ohenee ja tekkee maholiseksi pittää auki uuen oikotien kaupale ja muile kuljetuksile. Taiteilija Köken Ergun ja prutysentti Sasja Azanova oon syynänheet lähempää sitä kunka Kiina käyttää hyväksi tilanetta ja yrittää saa aikhaan vielä yhen osan ampišöösistä infrastryktyyriprojektista Belt and Road Initiative, jonka Xi Jinping pani matkhaan 2013.

Belt and Road Initiative tarkottaa laajaa kauppakoritooritten verkkoa rautateile, öljy-, ja kaasuputkile, laivoile, haminoile ja militääribaasile yli saassa eri maassa. Arktinen silkkitie oon lyhempi ja halvempi vaihtoehto perintheeliselle reitile Kiinasta Euruuphaan Malakkasalmen, Indian useaanin ja Suezkanalin kautta. Tämän takia Polarialue tullee strateekiseksi rintamaksi Shanghain, kaasurikhaan Jamaliniemimaan Sabettan, Kirkenesin/Kirkkoniemen ja Rotterdamin haminoitten avula. Osana plaania oon ette panna pysthöön ”arktisen koritoorin” rakentamalla rautatien Kirkkoniemestä Rovaniehmeen ja sen kautta kuljettaa tavaraa etehlään.

Ensimäinen osa Köken Ergunin ja Sasja Azanovan taiteprojektistä koostuu kahen kartan ja yhen viiteon instalašuunista. Värttikaalit kartat näyttävä mailman missä Nordpolen/Pohjoisnapa oon lähtökohta. Tämä harvinainen pärspektiivi nostaa näköselle iän- ja lännenväliset suhtheet ja Arktisen silkkitien haminat näkyvä selvästi. Viiteossa kuvathaan läheltä kunka iispryyttari/jäänmurtaja rikkoo jäätä pohjosessa. Instalašuuni näytethään Taitevärstassa.

ML 240507