Kin nykyaijan taitheen myseymmi oon Norrbottenin läänintaitemyseymmi nykyajan taitheele. Myseymmilä oon Barentsin alue jeokraaffisenna lähtökohtana ja kokoaa ja näyttää nykyajantaitetta moninaisesti mitä tullee taitheelishen ilmaishuun, meetihaan ja työmalhiin, Värksamheetti tapahtuu osittain fyysisesti myseymmin lukaalissa Stadshuset Kristallenissa, Kierunan kaupungin uuessa sentrymissä, ja osittain koko lääniä koskevan näyttely-, ja prušektivärksamheetin kautta. Tarkotus tällä oon tua taitheen ihmisiä lähemäks ja päästä juttelheen ihmisten kans Norrbottenin neljässätoista kunnassa. Kin aukasthiin 2018, ja sen päämies oon Kierunan kunta ja Region Norrbotten,
Näyttelyitten ja muitten taiteprušektitten lisäksi Kin vireästi tekkee välityksitten kans työtä . Syän oon Taitevärstassa Kaupungintalossa Kristallenissa, missä tarjothaan eri näytöksiä, työpajoja ja muita aktiviteettiä. Kläpit ja nuoret oon tärkeä porukka. Kin;ilä oon oma kokoelma johonka joka vuosi lisäthään uusia taiteteoksia,
Kin antaa kävijöile uusia elämyksiä, tietoja ja pärspektiiviä mailmasta ympärillä ja viekottelee vaphaan ajattelhuun, pannee matkhaan keskusteluja ja tekkee taitheen tärkeäksi ääneksi julkisessa ja temokraattisessa juttelussa. Johtotähti värksamheetissä oon ”kaiva missä seisot” ja ulttumalla toishiin yhteykshiin tekkee sen maholiseksi ette se joka oon lähelä ja se joka oon eempänä risthiinpölytehtään. Kin oon lyhenys nimestä Konstmuseet i norr.