Neljä resitensioleskelua Kin:issä syksylä 2024

Sen jälkhiin ko taiteilija Bernd Krauss fepryaarista/helmikuusta – marshiin/maaliskuuhun 2024 oli piluuttiresitensilä Kin:issä, myseymmi oon järjestänny vielä kaks taiteilijaresitensiä, Ylikaihnuussa ja Haaparannala Nina Svenssonile ja Apolonija Šušteršičin Kierunassa. Nyt oon aika vielä kahele pitemälle ja yhele lyhemälle resitensioleskelulle syksyn aikana taiteiljoile ja curatorille, jokka saava maholisuuen oppia tuntheen Kierunan ja Norrbottenin ja täälä tekheen töitä.

Ensimäinen paikala oon Köken Ergun septämperin/syyskuun lopussa. Hänen ja Sasha Azanovan näyttelyn yheyessä Kin:issä, Arktinen silkkitie, 3 oktuuperia/lokakuuta – 12 janyaaria/tammikuuta, Ergun oon kaks viikkoa Kierunassa. Tällä ajala hään monen muun asian lisäksi tekkee työtä Hjalmar Lundbohmin koulun esteettiprukrammin taiteviikon kansa. Tämä vernissagi tapahtuu tuorestaina 3 oktuuperia kello 16:00 – 18:00. Lauantaina 5 oktuuperia, kello 13.00, Ergun ja Azanova selittävä heän projektista näyttelyssä.

Taiteilija Aqui Thami kuuluu Thangmin ja Kiratiman alkuperäiskanshoin Himalayassa ja hänen resitensi oon osa Britta Marakatt-Labban retrospektiiviä näyttelyä Kin;issä. Oleskelu tapahtuu 1 syyskuuta – 20 joulukuuta, ja antaa hälle maholisuuen kohata saamelaisia vaimoja ja vaimoja muista minuriteetistä. Hään jatkaa työtä feminismistä, alkuperäiskansoitten oikeuksista ja taitheen maholisuuksista vahvistaa syrhjään jäähneitä ryhmiä. 13:00, 17 nuvämperiä/marraskuuta, Thami pittää luenon hänen työstä Kin;issä.

Lleah Smithin työ koskee niin petakokiikkaa, taitetta niinku curatorin työtä. Jääsäys sen eri muotoissa oon innostannu häntä tähän aivan erikoisheen malhiin. Kierunassa Lleah tullee tekheen läheistä yhteistyötä Kin;in porukan kans taitevälityksen kansa. Hänen resitensioleskelu kestää 19 oktuuperia – 16 joulukuuta. Hään pittää työpajan myseymmilä lauantaina 14 joulukuuta, 13:00. Smith oon kasunu Austraalian Cabrogal Countryssa ja toimii nyt paikassa Ngāmotu. Aotearoa.

Curatorin Madeleine Collien työ oon tutkiva ja näkkyy ussein seminaari-, ja työpajamuotossa, Vuona 2020 hään pani pysthöön Food Art Research Networkin joka kokoaa yhtheen niitä taiteilijoita ja muita kulttuurityöntekijöitä koko mailmassa jokka näkevä ruan ja politiikan estetiikkana. Hään toimii Melbournissa ja tutkii perintheelistä ruokaa ja kunka vanhaa tieto saattaa saa uutta elämää taasen. Hänen resitensin aikana, 11 – 27 nuveämperiä. Collie valmistellee monivuotista Kin:in projektia taitheesta ja ruasta.

Köken Ergun 24 septämperiä/syyskuuta – 8 oktuuperia/lokakuuta

Köken Ergun, syntyny 1976 Istanbulissa, oon taiteilija ja filmintekijä, jolla oon tausta lavataitheessa. Hänen filmit kertova porukoista joista harva tietää ja rityaalitten tärkeyestä näissä ryhmissä. Normaalisti Ergun oon näissä porukoissa matkassa pitkiä aikoja ennenko alkaa filmaahmaan. Projektia leimaava pitkät tutkimusajat ja Ergunin taiteilijatyöhön kuulu yhteistyö etnograaffitten, histuuriantietäjitten ja sosiolookitten kans. Hänen töitä oon ollu näkösellä seuraavilla paikoila; Documenta 14, Paristriennalissa, Jakartabiennalissa (2015 och 2021), Kathmandutriennalissa, Sydneybiennialissa, Martin Gropius Bau, SALT, Garage Moscow, Para-Site Hong Kong, KIASMA, Casino Luxembourg ja Kunsthalle Winterthur. Hään oon ottanu vasthaan usseita palkintoja, esimerkiksi Tiger Award , paras lyhytfilmi Rotterdamin Filmifästivaalissa ja Special Mention Prize, 2013 Berlinale. Ergunin töitä oon julkisissa kokoelmissa, niinku Centre George Pompidou, Greek National Museum of Contemporary Art, Stadtmuseum Berlin, Australian War Memorial ja Kadist Foundation.

Aqui Thami 1 oktuuperia – 20 joulukuuta

Aqui Thami kuuluu Thangmin ja Kiratiman alkuperäiskanshoin Himalayassa. Hään toimii nyt Maastrichtista. Hään oon samala taiteilija ja aktivisti hänen työssä, Se pohjautuu tehe-itte-kulttuuhriin ja perintheelishiin seremoniihin. Ette löytää paikkaa ja tialookin alkuperäiskansoitten kans oon itte syän hänen työssä. Alkhuunpanijanna semmoshiin ko Sister Library, Sister Radio ja Sister Press, hään nostaa framile feministisiä kertomuksia ja alkuperäiskansoitten selityksiä. Hänen voimakhaat teokset, niinku ”töng” ja ”Breathing with My Baje” oon esimerkkiä taitheen parantavasta voimasta ja vastustuskyvyn ja syrhjään jäähneitten ryhmitten vahvistamisesta. Dharavi Art Roomin ja Bombay Undergroudin kautta hään haluaa eistää yhteistyötä ja formyleerata selityksiä jokka haastava, innostava ja leviävä ko renkhaat veen päälä.

Lleah Smith 21 oktuuperia – 16 joulukuuta

Lleah Smith oon syntyny Austraalian Cabrogal Countyssa, mutta assuu nyt Ngāmotussa, Aotearoassa. Hään tekkee sammaa aikaa työtä petakokiikin, taitheen ja curatori-työn kansa ja toimii Aasiassa ja Tyyhneen meren aluela (Stilla Havet). Smith oon tehny toktorantitutkimusta Monash Universityssä ja University of Illinoisissa jossa hään meinaa ette jääsäyksen avula saapi ”opettajan”, spekylatiivin metaforin ja tietä näyttävän muutoksen voiman. Esimerkkiä hänen monesta projektista oon Radical Care Kit, Sydney Children’s Hospital (2023-2024), The Waterhouse, 23rd Biennale of Sydney, rīvus (2021-2022) och Kaldor Studio, Kaldor Public Art Projects x Art Gallery of NSW (2019). do it (homework) Kaldor Public Art Projects (2018). Hänen projektit sosiaalissa työssä sisältävä Hidden Lessons, Powerhouse (2021-2022) och FUTURE SCHOOL, Cementa 22 (2022). Septämperissä 2024 hään sai uuen viran; Cultural Experiences, Public Programs and Learning Govett Brewster/Len Lye Center och Puke Ariki Ngāmotussa, Aotearoassa. Sitä ennen hään oli Curator, Programs and Learning vid Sydneyn bienalissa. Hään kuuluu ryhmään Arts. Creativity. Education Research Group, Monash University.

Madeleine Collie 11-27 nuveämperiä

Madeleine Collien curatorin-työtä leimaa tutkiva luone ja näkkyy ulospäin seminaarina ja työpajoina, joskus kans näyttelyinä. Viimi aikoina hään oon tutkinu kunka sosiaalit yhteyet saattava syntyä suhtheessa kasvhiin ja valtavitten plantašitten vastustuksena.
Vuona 2020 hään perusti Food Art Research Networkin ja sai siihen tuen Arts Council Englandilta, joka kokoaa niitä taiteilijoita ja muita kultturityöntekijöitä koko mailmasta jokka pitävä ette ruoka oon politiikkaa ja estetiikkaa. Hään oon jatkanu työtä rakentaa verkkoja jokka tukeva niitä taiteilijoita jokka näkevä eekkosystemitten muutoksitten yhteyet sosiaalhiin, historiaalishiin ja polittishiin voihmiin. Hään tekkee työtä Melbournissa ja Folkstonissa olletikki perintheelisten ruokatavaroitten kans ja kunka vanha tieto sais uutta elämää tänäpäivänä. Hänen resitensioleskelun aikana, 11 – 27 nuvämperiä, Collie valmistellee monivuotista projektia Kin taiteesta ja ruasta.

Bild: Aqui Thami, Boju, stillbild ur Ceremony for the Shrine in Basel, 2024.