Katarina Spik Skum ja nykyaijan taitheen myseymmi kirjailijasentrym sápmin näyttelyssä Jöötteporin kirja-ja pipluteekkimessula

Poronnahasta tehtyjä istumasäkkiä, pumpulivaatetta missä oon saamelaismyöstäriä, puusta tehtyjä pöytiä missä oksitten muoto on säästetty ja rákkas, ohukaisesta vaatheesta tehtyjä sääskitelttoja. Siinä esimerkkiä saamelaisista vaihtoehoista mitä tarjothaan Sáphmin montterissa Kirja- ja Pipliuteekkimessula Jöötteporissa. Tämän oon tehny ja luonu saamelaiskäsityöntekijä, duojár, ja taiteilija Katarina Spik Skum. Toolia ja isoja pöytiä oon lainattu Röhsska myseymmistä, kahen kilometrin päässä messuilta, mikä oon saamelaisen perintheen mukhaan ko haluthaan uuelheenkäyttää matriaalia ja tehjä yhteistyötä. Tämä kaikki yhtheen saapi aikhaan miljöön missä tuntee ittensä tervetulheeksi ja missä oon hyvin siiaa istahtaa ja jutela tähän saakka issoimassa kulttuurisatsauksessa koskhaan Sápmin ulkopuolela.

Sáphmi oon yks teema messula ja se joka tästä montterista vastaa oon Tjállegoahte Kirjailijasentrym Sáphmi Jokimukassa. Het puolesta oon tahtonheet matkhaan usseita saamelaisia förlaakia/kustantajia, orkanisašuunia ja instittyšuunia tuohmaan osansa tähän neljä päivää pitkhään prukramhiin. Kin myseymmi nykyaijan taitheele Giron/Kierunassa kuuluu näihin kuttuthuin ja myseymmi oon siksi tahtonu Katarina Spik Skumin rakenthaan huohneen. Messun jälkhiin hänen teokset siirethään Kierunhaan Kin:in kokoelhmiin ja käytethään muun muassa myseymmin Taitevärstassa.

Spik Skum tekkee valtavan käsityölahjakhuuen ja matriaalin tuntemuksen avula teoksia, joitten kans ellää, ussein yhteistyössä muitten saamelaiskäsityöntekijöitten ja -taiteilijoitten kansa. Ko hään tuopii saamelaiskäistöitä, duodjii, muile paikkakunnile, niin hään kantaa matkassa perintheet ja taitheen Luulajansaamelaiselta alueelta. Innostusta hään noutaa elämästä mamman perheen kansa koassa lapsuuen kesinä ja köyttää sen yhtheen nykyaijan matriaalitten ja muotoitten kansa. Hään toimii Jokimukasta/Jåhkåmåhkesta ja takana oon maasteri-äksaami saamelaiskäsityössä Sámi allaskuvlassa Koutokeinossa/Guovdageaidnu. Hällä oon 2010-luvun alusta lähtien ollu matkassa eri näyttelyissä niinku Jokimukassa/Jåhkåmåhkke, Arjeplogissa/Árjepluovve, Luulajassa/Julevu, Karasjoessa/Kárášjohka, Bodössä/Bådåddjo, Tukholmassa ja Torontossa. Hänen teoksia löytää usseissa julkisissa taitekokoelmissa/konstsamlingar.

Yhteistyössä arkkitehtin ja taiteilijan Joar Nangon ja hänen Girjegumpi-projektin, mikä oon mupiili ja koko ajan muuttuva pipliuteekki saamelaisesta arkkitehtyyristä ja kulttuurista, Katarina Spik Skum oli matkassa Venedigin arkkitektyyribiennaalissa 2023. Hään oon kans ollu Sáphmi Salasta – alkuperäkansan resitensi Lusspie/Storumanissa. Hään oon muun muassa ottanu vasthaan Sámi Duodjin työstipentiymmin Asa Kitokin muistoksi ja Gannevikinstiymmi muoto-alala.

Kello 14:30 – 14:50 tuorestaina 26 syyskuuta/septämperiä Katarina Spik Skum ja Maria Lind, Kin nykyaijan taitheen myseymmin johtaja, jutteleva Katarinan taiteelisuuesta Tjallegoáhten montterissa.
Seuraavina aikoina hään esittää näyttelyn; kello 19:00 tuorestaina 26 syykuuta, Kello 12:00 ja 17:00 perjantaina 27 syyskuuta, kello 12:00 ja 15:00 lauantaina 28 syyskuuta, ja kello 13:00 pyhänä 29 syyskuuta.