Tyylikas ja toimiva: Jon Tomas Utsin duodji

Jon Tomas Utsi oon duojár, saamelaiskäsityöntekijä, joka 30 vuotta oon tehny kovista materiaalista käsitöitä. Näköselle oon niibbit, puukkoja, gárit, skoolia, skáhput, rasioita, giissát, kiisoja, nállogoadit, neulakoteloja ja sálkorat, suolasalkkaria. Kaikila oon alkuperä saamelaisessa elämässä Sáphmissa. Koska ussein oon siirtytty paikasta toisheen niin kampheet oon kevveitä ja näpperiä. Aivan niinku toisetki duojárat, Utsi tuntee kapihneitten koko elämänkaahreen, aina materiaalitten hakemisesta ja kampheitten tekemisestä niitten käythöön.

Utsi hoitaa niin poroja ko tekkee käsitöitä, aivan niinku pappansa/isänsä ja farfaarinsa/isoisänsä. Yhessä saamen kielen kansa duodji vahvistaa sitheitä polvitten välilä ja oon tärkeä osa saamelaisessa kulttuurissa.

Näistä eri kapihneistä oon tietoja jo 1500-luvulta saakka ja muo´ot oon pysyhneet samanlaisina tähän päihvään saakka. Mutta se ei merkitte ette semmonen duojár niinku Jon Tomas Utsi ei laita hänen ommaa leimaa siihen mitä tekkee. Koko ajan tapahtuu uutta muotoilua ja uusia linjoja luothaan. Kaikkia pystyy kehithään ko vain pohjana oon tratišuuni. Tekniikka, materiaali, työntekomalli ja koristelu antava tämän lisäksi kapinheile paikalisen leiman.

Näyttely oon osa myseymmin monivuotista satsausta Käsi, syän ja aivo, joka selittää siittä kunka nykyajan taiteelijat ottava käythöön entisajan käsityötaitoja ja muokkaava sen tämän päivän ja tulevaisuuen käythöön.