Tenskasven (IKEApayback): Bernd Krauß täysikokosenna

Tässä ”repro-spektiivissä” taiteilija Bernd Krauß syynää hänen kolmekymmentä vuotta pitkää taiteelista työtä, josta kakskymmentä vuotta oon tapahtunnu Ruottissa. Taitevärstan trapussa fuukkys oon sisustuksessa; Kunkas sitä laittaa oman paikan niin ittele ko samala kertaa taitepraktiikale? Millä laila vaikuttaa stabiliteetti omhaan elähmään ja kans taitheen luomisheen?

Ja piiain se mikä oon kaikista tärkein: millä mallin yhteyet taitheen, fynkšuunin ja asumisen välilä tulis kuttuksi ulkopuolisille istahtaa alas ja huomaahmaan ette taite oon tärkeä asia joka koskee heitä. Kolmanella vooninkila se jatkuu jonku sortin eksperimenttipaikala ittestä luomisprosessista: ”resäptikirjala” missä viiskymmentä Kraußin entisistä teoksista oon matkassaja joista osan kävijät saattava lua uuelheen. Esimerkiksi: hakea hyysikkäparperia nurkan takkaa, koota niistä munan tapeetiliiman avula ja sitten pistää niitä 5, 10 eli12 munakartonghiin. Valmistuu äkkiä—aika nopeasti niistä tullee ”Bernd Krauß-munia”. Mutta mitäs niilä sitten tekkee?

Hänen Kin-näyttelyn yhteyessä taiteelija, joka oon syntyny 1968 Nűrnbergissä, viettää residensio-leskelun myseymmissä ja johtaa taiteilijakolloa sporttiluvala. Taiteilijakollo oon jatko Kierunan Taiteakatemiile, jonka hään pani matkhaan Kin;in pääsiäiskollossa 2024. Krauß tekkee töitä monessa muossa—maalaamalla, veistämällä, valokuvvaamalla ja monela muula tavala—ja keksii tilaisuuksia näyttelyhuohneissa ja muissa paikoissa, jokka ajan olhoon kasvava niinku leikkisät intervenšuunit, Kraußi ottaa käsittelhyyn näkymättömiä ja yllättävi yhteyksiä, joita hän yhessä koulukläpitten ja nuoritten täysitten kansa nostaa näköselle.

Tätä työmallia saattaa parhaiten kuttua tetektiivitehtäväksi eli erilaiseksi retkeksi. Näyttelyn nimi viittaa esimerkiksi semmosseen ko Svenskt Tenn, sisustuskauppa Tukholmassa, joka yhistethään käsityöhön ja niin sanothuun hyvhään makhuun, ja IKEA:n mööpelhiin. Hänen kekseliäs ”tehe-se-itte-tekniikka johtaa ussein uushiin malhiin kattoa ympäristöä, niin pienemissä sosiaali piirissä ko koko yhteiskunnassa.

Näyttely oon osa Kinin monivuotista temaattista lankaa Käsi, syän ja aivot