Kinin kokoelma 2

Anastasia Bogomolova, Salad Hilowle, Britta Marakatt-Labba, Elle Hansa/Hans Ragnar Mathiesen, Katarina Pirak Sikku, Oleksandra Ravska, Aqui Thami, Jon Tomas Utsi ja Lena Ylipää

Kin nykyaijan taitheen myseymmissä oon kokoelma mihinkä kuuluu yli kakssattaa taiteteosta 1960-luvulta ja etheenpäin. Myseymmi kokoaa ja näyttää nykyaijan taitetta jolla oon monenlaista taitheelista muotoa, mediamallia ja praktiikkaa ja jolla oon jeokraaffisenna lähtöpohjana Barentsin alue. Johtotähti Kinin työssä oon ”kaiva missä seisot”, josta se kurkottaa muihin yhteykshiin niin ette pääsee yhistämhään sen mikä oon lähele sen kansa mikä oon kauempanna. Mikä oon paikalista, alueelista ja kansanvälistä solmithaan yhtheen. Sillä mallin kokoelma kasvaa teoksila jokka kertova myseymmissä pietyistä näyttelyistä ja muista taiteprojektistä.

Tässä toisessa taite-esittelyssä Kinin uuelheen staartin jälkhiin helmikuussa 2024, kohtaama muun muassa Jokimukassa toimivan Katarina Pirak Sikun valokuvia otettu rotubiolookitten jäljissä niilä seuvuila missä hänen saamelaiset sukulaiset elit ja plyyertsipiirostuksia mitä lainiolainen Lena Ylipää oon tehny arkikampheista. Salad Hilowlen, joka oon syntyny Mogadishussa, kasunu Gävlessä ja assuu Tukholmassa, lähtee viiteoteoksessa Sylwan Sveriges Televisionin klassisesta filmauksesta Pippi Långstrump ja kertoo tuntemattoman histuurian afroruottalaisesta artistiperheestä. Samala oon näkösellä Olexandra Ravskajan maalaus, jonka hään teki ko alussa 2023 tuli soan jaloista Odessasta Luualajhaan Konstnärernas kollektivverkstadhiin.

Tekstiiliteos Tähitten jalanjäljissä III vuesta 2024 anto nimen Britta Marakatt-Labban retrospektivhiin Kin;issä samana vuona ja oon nostettu näköselle hänen muitten vanhemitten privaatissa omistuksessa olevitten teoksitten kansa ja myseymmin omassa omistuksessa olevitten graaffisten plaavitten kansa, osana restrospektiiviä tahothiin alkuperäiskansataiteilijan Aqui Thamin Himalayasta residensioleskelhuun Kin;issä ja hänestä oon nyt kokoelmassa valokuva. Palkitun duojarin Jon Tomas Utsin työtä eustaa veitti ja pahkakuppi, joissa oon tyypilinen pohjoissaamelainen koristus. Matkassa oon kans Elle Hansan ja Hans Ragnar Mathiesenin kolme legentaarista karttaa, jokka oon luotu saamelaisesta pärspektiivistä.

Kaikitten näitten yläpuolela leijailee kolme tuukia, joissa oon Jekaterinburgissa asuvan Anastasia Bogomolovan kuvia, missä ruuhmiinosat yhistyvä puunoksitten ja juuritten kansa ja missä ihmisen ruumis ja sen rajat ei ole ittestänsä selviä.