Kin čoakkáldat 2

Anastasia Bogomolova, Salad Hilowle, Britta Marakatt-Labba, Elle Hansa/Hans Ragnar Mathiesen, Katarina Pirak Sikku, Oleksandra Ravska, Aqui Thami, Jon Tomas Utsi och Lena Ylipää

Kin dálááiggedávvirvuorkkás lea čoakkáldat, mas leat badjel guoktečuođi dáidaga 1960-logu rájis ovddos. Dávvirvuorká čoaggá ja čájeha dálááiggedáidagiid, main leat juohkelágán dáiddalaš ovdanbuktinvuogit, mediat ja geavadat, ja maid geográfalaš vuolggasadji lea Barentsregiovdna. Kin vuođđojurdda lea ahte vuolgit báikkálaš dásis ja de faŋuhit iežá ollisvuođaid nu ahte lagašvuohta ja dat, mii lea guhkkin eret vuohkkasit ovttaiduvvet. Báikkálaš, regiovnnalaš, nationála ja riikkaidgaskasaš bealit nu biddjojit oktii. Ná čoakkáldat lassána dáidagiiguin, mat govvidit dávvirvuorkká čájáhusaid ja iežá dáiddaprošeavttaid, mat leat leamaš Kin:as dahje maid Kin lea vuolggahan.

Dán ovdanbuktimis lea Johkamohkidáiddára Katarina Pirak Sikku govva, maid son lea govven nállebiologaid vugiin eatnamiin, gos su sámi sogolaččat elle, ja maiddái Lávnjitlačča Lena Ylipää liántasárgumat beaivválaš atnubiergasiin. Čájáhusas lea maid Salad Hilowles, gii lea riegádan Mogadishus, bajásšaddan Gävles ja orru Stockholmmas, ealligovvadáidda Sylwan, mii vuolgá Ruoŧa Televišuvnna klassihkalaš Pippi Långstrump filmatiseremis ja muitala dovdotmeahttun muitalusa afro-ruoŧŧelaš dáiddaveagas. Seammás čájehuvvo maiddái Alexandra Ravskaja dáidda, man son dagai go son jagis 2023 bođii soađi Odessas Dáiddáriid oktasašbádjái Luláhis, Konstnärernas kollektivverkstad i Luleå.

Tekstiiladáidda Guorrat násttiid luottaid III jagis 2024 dat nammadii maiddái Britta Marakatt-Labba muittašeaddji čájáhusa seamma jagi, ja dat dál čájehuvvo ovttas mottiin boarrásit priváhtta dáidagiiguin ja dávvirvuorkká gráfalaš bláđiiguin. Oassin muittašeaddji čájáhusas bovdejuvvui Himalayalaš eamiálbmotdáiddár Aqui Thami resideansaorrumii Kin:as, ja govva sus gávdno dal Kin:a čoakkáldagas. Čájáhusas leat maid beakkán duojára Jon Tomas Utsi duojit, dohppa ja guksi typihkalaš davvisámi girjjiiguin, ja guokte Elle Hánssa, Hans Ragnar Mathiesena, máinnolmas kárttáin, main lea sámi geahččanguovlu. Badjel visot dáid dáidagiid sattáhallet golbma ránu, main leat Jekaterinburgalačča Anastasia Bogomolova ivdnás govat, main iešguđetge gorutlahtut ovttastuvvojit muora ovssiiguin ja ruohttasiiguin – olbmo gorut ii leat diehttelas.