Aurinkotaulu—Matts Leiderstam, prinsi Eugenin alttaritaulu ja Kierunan kirkko

Ko Kierunan kirkko siirethään sen nykyseltä paikalta matalan tunturin laijasta aykystissä 2025 seuraa sen tunnettu alttaritaulu, jonka prinsi Eugeni oon maalanu, matkassa. Tässä näyttelyssä taiteilija Matts Leiderstam oon syventyny maalauksen syntymishistuurihaan ja olletikki prinsin skishiin ja iteatyöhön. Oman maalaamisen ja pitkhään kesthänheen innostuksen kattoa maisemia, hään tutkii kunka valo, vallatikki auringonvalo, antaa alttaritaulule muotonsa.

Näyttelyssä Aurinkotaulu Leiderstam köyttää kokhoon omia ja entisiä tutkmuksia alttaritaulusta, ja esittää tämän tekstissä, maalauksessa, instalašuunissa ja sen kautta kunka kampheita oon tällätty näyttelyn vintriihniin. Aurinkotaulu sisältää viis ossaa, jokka kertova eri aspektiä alttaritaulusta, mutta kans niistä eri tavoista joittenko avula Leiderstam lähestyy taulua. Sen lisäksi näytethään semmositten taiteilioitten teoksia Kierunan kunnan kokoelmista, jokka olit prinsin läheisiä ja jokka kuvvaava Kierunan kaupungin ensimäisiä vuosia. Näyttely järjestethään yhteistyössä Prins Eugens Waldemarsudden kansa, missä se oon näköselä talvela 2025-2026.

Ylheisessä äänestyksesä Arkkitehtivuona 2001 Kierunan kirkko nimitethiin ”Kaikkien aikojen parhaaksi pytingiksi, rakenettu ennen 1950”. Kirkon piirsi Gustaf Wickman, joka sanothaan oli siihen hakenu innostusta puukirkoista ja saamelaisista koista. Se oli rakenettu valhmiiksi 1912, samala ko Eugenin alttaritaulu oli paikala. Nyt, sata vuotta jälemiten, kirkon joutuu siirtämhään niitten maahalkeimitten takia jokka johtuva LKAB;n kruuvatoiminasta ja jokka tekevä isot osat vanhaasta kaupunginyimestä kelvottomaksi asumisheen.

Tämä harvinainen alttaritaulu, ilman ristiä ja Raamatun hahmoja, seuraa matkassa koska se oon seihnään kiini liimattu ja mahoton saa irti. Maalauksen keskelä oon lehtipuita aukeala. Se oon rauhalinen, etelän maisema kaukana Kierunan tunturimailmasta. Tässä luonto oon sielukas ja kantaa hengelisyyttä. Piiain prinsi, ilman ette itte sitä ymmärsi, tässä hahmottaa net tulevaisuuen maisemat Kierunassa, joihinko vaikuttaa ei vain maan alla tapahtuva kruuvatoiminta, mutta kans net klimaatinmuutokset jokka saattava tuo matkassa aivan toisenlaisen kasvilisuuen.

Bild 1, 3, 4: Matts Leiderstam, målningar ur serien Soltavlan
Foto: Matts Leiderstam
Bild 2: Skiss prins Eugens altartavla och Matts Leiderstam, målning