Reikä toelisuuessa: Dora García, Pablo Picasso ja kruuvajypileymmi

Ko kruuvafirma LKAB 1965 juhlii hänen 75-vuotisjypileeymmiä niin piethiin ampišöösi näyttely Pablo Picasson (1881-1973) taitheesta. Näyttelyssä, jonka nimi oli Picasso Kierunassa, oli näkösellä sata tämän 1900-luvun kunnioitetuiman taiteilijan teosta yheksän päivän aikana Kierunan entisessä kaupungintalossa. Nyt kuustoista teosta Moderna Museymmin kokoelmasta oon takasi kaupungissa ja Spanniassa syntyny feministinen taiteilija Dora García ottaa taistelun niin Picasson ko kruuvaintystriin kansa.

Picasson kypismi, klassisismi, syrealismi ja rauhansanoma kuuluva näyttelhyyn, missä García kans tuopii näkösele LKAB;n tuplat rollit kansansivistajannä ja eksploatöörinä. Mielessä Garcíala, ko se oon luonu uuen sarjan teoksia, oon meän nykyaijan horisontti mutta kans Picasso-näyttely 60 vuotta sitten. Häntä ihmetyttää ja samala pöläättää se suuri reikä joka oon Kierunassa, mutta hään löytää kans taiteilijan joka tohti ottaa kannan fasismia vasthaan. Näyttelin nimi—Reikä tolelisuuessa—oon lainattu Garcían teoksesta, jossa viitathaan psykoanalyyttikkerin Jacques Lacansin (1901-1981) itehaan pistheestä toelisuueessa ko kieli ja tarkotus romahtaa.

Se taitheen välittämisprojekti, joka tapahtu Kierunassa 1965, oli merkilinen. Picasso ei koskhaan ennen ollu pitäny näyttelyä napapiirin yläpuolela ja Ruottin valtion pyrkimys tarjota kulttuuria maan eri osissa teki ette Norrbottenista tuli paikka suurenlaisile taiteprojektile. Mikäs ei silloon sopinu paremin ko ette yhistä se valtion omistama firma, jotako piethiin uuen aijan keihäänkärkenä, sen taiteilijan kans, joka enempi ko kukhaan muu ennen häntä, eusti muternin projektin uusluomista ja etheenpäin pyrkimistä. Nationalmuseum, Norrbottens museum, Kierunan kunta ja LKAB yhistit voimat Picasso näyttelyssä, jonka matkassa seurasi suuri välitysohjelma.

Kuuskymmentä vuotta jälemiten Picassosta kuva oon muuttunu, mutta kysymykset kulttuurin rollista, vallan jeokrafiista ja taitheen maholisuuksista on vielä yhtä polttavia. Garcían työn avula tämä näyttely oon yhtä hyvä maholisuus miettiä meän yhteistä tulevaisuutta, ko ette tutkia aivan erikoista tapahtumaa Ruottin taitehistuuriassa.

Bild 2: Pablo Picasso, Figure
Bild 3: Sida ur Nationalmusei utställningskatalog - 1956
Bild 4 - 6: A hole in the real - Bilder av Johan Ylitalo