Kunka käyttää valokuvia: Borg Mesch ja Hans-Olof Utsi

16 aprilliä/huhtikuuta – 18 oktuuperia/lokakuuta 2026

Tämän näyttelyn yin oon viiettäkymmentä Borg Meschin (1869-1956) kuvausta Kierunan ensimäistä vuosikymmenistä, rautatien rakentamisesta Atlantin rannale, mahtvavista pohjosen maisemista ja saamelaisesta alkuperäkansasta. Muutamat valokuvista olit matkassa näyttelyssä jonka Studio Borg Mesch järjesti 1950 ko juhlithiin kaupungin 50-vuotisjuhlaa. Toishaalta Kierunassa toimiva saamelainen valokuvvaaja Hans-Olof Utsi oon tokymenteeranu kunka Meschin kuvia käytethään kaupungissa ja kunka niile annethaan paikka nykyaijassa, koska niitä kohtaa esimerkiksi uimahallin ulkoseinälä, hoteelitten vasthaanotoissa ja vanhoittenasunoissa.

Mailmala kulkenut Mesch oli vireä alala ja piti vissiä aikoja ateljeitä yhtä aikaa monessa paikkaa maassa. LKAB ja Svenska Turistföreningen kuuluit niihin jokka ussein tahoit hältä töitä. 1800-lopula pohjoisesta Ruottista oli tullu eksoottinen reisuitten kohte koulutetulle porvaristole ja Mesch, joka oli luontoa rakastava ääventyyrari, luontoseikkailija, fiksasi matriaalia föreningin vuosikirhjaan ja tuotti kans postikorttia ja alpymmiä hänen tunturimaisemista. Hänen valokuvat antava ynikin kuvan intystrialiseeringistä pohjosessa ja siittä kunka Kieruna kasusi paikalisten tarpheitten ja koko maan rahalisten inträssitten jännitheissä. Nämät olemassaolevat printit Kierunan kuvakokoelmasta, jokka oon eri näkösiä ja tuotettu eri aikoina, ja Utsin uuet teokset antavat näyttelyssä kuvan siittä kunka Meschin valokuvia oon käytetty vuositten varrela. Net kertova kans kunka valokuvvausta eri aikoina oon kattottu histuuriaalisenna tokymenttinä ja esteettisennä opjektinä.

Näyttelyn Curatorit oon NIclas Östlind ja Hans-Olof Utsi

Näyttely oon kans osa Kin;in monivuotista projektia Borg Mesch: en fotograf i Sápmi under den koloniala perioden joka lähtee valokuvvajan elämästä ja toimesta. Utsin ja Östlundin lisäksi taiteilijat Geir Tore Holm, Mikhail Tolmachev ja Norrakollektivet oon matkassa projektissä, joka oon yhteystyö Kierunan kunnan kulttuuri-, ja koulutusosaston kansa. Näilä oon hallussa laaja kokoelma Meschin valokuvia. Projekti oon osa Kin;in monivuotista temaattista lankaa Den kritiska zonen.

Bild 1: Bruket av fotografi: Borg Mesch och Hans-Olof Utsi
Bild 2: Bruket av fotografi: Borg Mesch och Hans-Olof Utsi
Bild 3: Hans-Olof Utsi
Bild 4: Borg Mesch