Britta Marakatt-Labba Saamelaisessa myseymmissä

Auktioloajan: Maanantaista perjantaihin kello 7:00-15:00

Saamelainen arki ja politiikka, tapahtumia histuuriassa ja mytolookisia osia – kaikki sopiva yhtheen taitelijan Britta Marakatt-Labban killatussa kuvamailmassa. Näyttelyn kraaffiset julkaisut oon peräsin niistä teoksista, missä hään vääva yhtheen omia kokemuksia elämästä pohjosessa sen klimaattikriisin kansa, josta koko planeetta kärsii. Monen vuosikymmenen aikana hään oon luonu rikhaan ja puettisen kertomuksen saamelaisista, ainua tunnustettu alkuperäiskansa Euroopassa, ja heän taistelusta maan ja kulttuurin puolesta.

Marakatt-Labba synty 1951 poronhoitoperheessä Ađevuopmi/Idivuomassa. Hään assuu ja tekkee töitä Badje Sohppar/Yli-Sopperossa, joka oon kylä, niinku Idivuoma, Kierunan kunnassa, ruottinpuolela Sáphmia. Ette hään oon kasunu ylös saamelaisessa kulttuurissa oon vaikuttannu hänen taitheesheen. Varhaisesta iästä hään oon hommanu duodjin, saamelaiskäsityön, kansa, ko oon tehny kolttia ja muita vaatheita nahasta ja tekstiilistä. Ja vielä tänäpäivänäki hään itte färjää vaatetta ja lankaa ja myöhemissä teoksissä käyttää eri teknikkoja, niinku proteerausta, painoa ja aplikašuunia, yhessä ja samassa kuvassa.

Marakatt-Labba oon tehny työtä taitelijana 1970-luvulta asti ja hänen vaikutus taitheesheen Sáphmissa oon iso. Siittä saakka ko hään sai kansainvälistä tunnustusta 2017 nykyaijan taitheen näyttelyssä Documenta 14 Kasselissa ja Venetikin biennaalin päänäyttelyssä 2022 hään oon saanu paljon huomiota ympäri mailmaa ja hänen teokset kuuluva nykyhään monheen taitekokoelhmaan.

Näyttely oon yheistyö Kiruna Sameföreningin, joka hoitaa Samiska museetiä, ja Kin nykyaijan taitheen myseymmin välilä. Kin:issä oon näkösellä vielä muikaki Marakatt-Labban teoksia.